Araz Abdullayev: “Azarkeşləri başa düşürəm"

“Neftçi”nin kapitanı Araz Abdullayev “Şkendiya” ilə oyundan sonra jurnalistlərin suallarını cavablandırıb. Futbolxeber.az saytı A. Abdullayevin müsahibəsini təqdim edir:

- Qolsuz tamamlanan qarşılaşmaq haqda nə deyə bilərsən?

- Oyun çox ağır keçdi. Hava çox isti idi. Buna baxmayaraq, komandamız əlindən gələni etdi. Ən azından 1 qol vurmaq istəyirdik ki, səfərə sərfəli nəticə ilə yollanacq. İndiki halda 0:0 hesabı da pis deyil. Səfərdə vuracağımız qol bizə şans gətirə bilər. Həmin görüşə yaxşı hazırlaşmalıyıq.

- Sanki “Neftçi” meydana heç-heçə üçün çıxmışdı...

- Xeyr. Fikrimiz qələbə qazanmaq idi. Azarkeşlərimiz önündə oynayırdıq. Ötən dəfə “Balzan”la oyunda məğlub olsaq da, azarkeşlərimiz yenə bizi tək buraxmadılar Buna görə fanatlara təşəkkür edirəm

- Azarkeşlərin ən çox tənqid etdiyi futbolçulardan da biri sənsən. Buna münasibətin necədir?

- Azarkeşləri başa düşürəm, “Neftçi” böyük komandadır. Səhv edəndə narazılıq edirlər. Buna görə onları anlayıram. Normal tənqidə həmişə normal yanaşıram.

- “Şkendiya” ilə görüşdə sanki məsuliyyəti üzərinə götürə bilmirdin. Bu nədən irəli gəlirdi?

- Bu dəfə hücumda oynayırdım. Bu da bir qədər çətinlik yaradırdı. Yarımmüdafiədə çıxış etmək daha rahatdı. Oyun ərzində qapıya zərbə endirsəm də, fərqlənmək mümkün olmadı.

- “Neftçi” səfərdə lazımi nəticəni qazana biləcək?

- Futboldu, hər şey ola bilər. Hesab edirəm ki, qələbəni kim çox istəsə, kim meydanda çox mübarizə aparsa, o da qalib gələcək.

- “Neftçi”nin gücü Skopyedə 120 dəqiqə mübarizə aparmağa çatar?

- Cavan komandayıq. Fiziki cəhətdən zəif olduğumuzu deməzdim. Dayanmadan üzərimizdən işləyirik. Hər şey oyunun gedişatından asılıdır. Görəndə ki qalib 90 dəqiqə ərzində müəyyənləşməyəcək, o zaman gücüvü əlavə vaxta uyğun bölürsən.