Vəli Qasımov: “Avroliqada nə qədər bacarsaq, irəli gedəcəyik”

"Komandamız Maltadan qayıtdıqdan sonra istirahətsiz məşq edir. İnanıram ki, səfərdə olduğu kimi evdə də yaxşı nəticə qazanacağıq”. Futbolxeber.az saytının məlumatına görə, bu sözləri "Neftçi"nin baş məşqçisi Vəli Qasımov deyib.

Avroliqanın I təsnifat mərhələsinin cavab oyunu çərçivəsində öz meydanında Maltanın “Balzan” klubunu qəbul edəcək “ağ-qaralar”ın çalışdırıcısı ilk oyundakı 2:0 hesablı qələbəyə baxmayaraq, ikinci görüşə ciddi yanaşdıqlarını vuğulayıb: “Hələ ki Malta klubunu keçməmişik. Amma növbəti mərhələdəki rəqiblərə gəlincə, hər ikisi normal komandalardır. Makedoniya komandası güclüdür. Avroliqada nə qədər bacarsaq, irəli gedəcəyik”.

Vəli Qasımov “Neftçi” ilə müqaviləsi bitən braziliyalı müdafiəçi Aylton Silvayla danışıqları davam etdirdiklərini vurğulayıb: “Bu məsələ açıq qalır. Onun komandaya qayıdıb-qayıtmayacağı barədə dəqiq nəsə deyə bilmərəm. Bir hücumçumuz var. O da Ruslan Qurbanovdur. Axtarışlarımız davam edir. Daha bir forvard transfer etmək istəyirik. Lakin hələ istədiyimiz hücumçunu tapa bilməmişik”.