AFFA prezidenti klublara söz atdı: “Qaydaları bilmək lazımdı”

AFFA prezidenti Rövnəq Abdullayev Azərbaycan klublarının legioner futbolçularla maddi problemlər yaşaması haqda danışıb. Futbolxeber.az saytının məlumatına görə, Abdullayev problemlərə görə klubları günahlandırıb: “Bu məsələdə günahkar klubların özləridi. Qaydaları oxumaq, bilmək lazımdı”.

AFFA prezidenti “Kəpəz”ə məhz assosiasiyanın maliyyə yardımı etdiyini gizlətməyib: “Bu gün Azərbaycan çempionatında klubların bir çoxu azarkeş problemi yaşayır. Bu məsələni mətbuat da qabartmalıdı. Yalnız “Kəpəz”də vəziyyət fərqlidi. Gəncə klubunun oyununa ötən dəfə 23 min azarkeş gəlmişdi. Həmin klubun maddi vəziyyəti elə də yüksək deyil, komandada ulduz legioner yoxdur. Amma yenə də azarkeş gəlir. “Kəpəz”ə AFFA böyük maliyyə yardımı ayırır. Bu heç kimə sirr deyil”.