Rəşad Sadıqov: “Qələbə üçün əlimizdən gələni etdik”

“Əlimizdən gələni etdik ki, bu oyunda qələbə qazanaq. Erkən qol vurmaq haqda fikirləşirdik. Amma düşündüyümüzdən də tez alındı”. Futbolxeber.az-ın məlumatına görə, bu sözləri milli komandamızın və "Qarabağ"ın kapitanı Rəşad Sadıqov Avro-2016-nın seçmə mərhələsində Maltaya qalib gəldikləri oyundan (2:0) sonra jurnalistlərə açıqlamasında deyib.

Qarşılaşmanı şərh edən təcrübəli müdafiəçi oyunun asan keçmədiyini bildirib: “Qoldan sonra daha ehtiyyatlı oynamağa başladıq. Rəqibin meydanın mərkəzində təzyiqləri artmışdı. Bizə rahat oynamağa imkan vermirdilər. Buna baxmayaraq, ilk hissədə bir neçə qol epizodumuz oldu. Amma istifadə edə bilmədik. İkinci hissədə rəqib sistemini dəyişdi. Təzyiqləri daha da artdı. Matçın ilk yarısına nisbətən ikinci yarıda bərabər oyun getdi. Çox sevinirik ki, çətin olmasına baxmayaraq ikinci qolu da vurduq və qalib gəldik”.