Yaşar Vahabzadə: “Yerlilərlə eyni səviyyədə olsa, o futbolçunu milliləşdirməyəcəyik"

21 yaşadək futbolçulardan ibarət milli komandamızın baş məşqçisi Yaşar Vahabzadə Futbolxeber.az saytına müsahibə verib.

- Bu gündən etibarən U-21-in Antalyada təlim-məşq toplanışı başlayır. Hazrlıq prosesinə istədiyiniz bütün futbolçuları cəlb edə bildiniz?

- Tam istədiyimiz heyəti yığa bilmədik. Çünki “Neftçi”nin AZAL-la təxirə salınmış oyunu var. Buna görə də həmin komandalardakı futbolçulara dəvət göndərə bilmədik. Üstəlik, I diviziondan da namizədlərimiz var. I divizionda isə ikinci dövrə start götürür. Artıq həmin futbolçuları növbəti toplanışda sınayacağıq.

- Antalyada əsas millidən hansısa futbolçuların U-21-ə qoşulması mümkündür?

- Hə, mümkündür. Millinin baş məşqçisi ilə bu barədə söhbətimiz olub. Əsas millinin düşərgəsində olan və yaşı U-21-ə düşən futbolçular var. Razılıq verilib ki, yoxlama oyunları zamanı həmin futbolçular bizim komandaya kömək edəcək.

- Açıqladığınız heyətdə “Eskişehirspor”un üzvü Dəniz Topçu da var. Ona dəvət göndərməyiniz heç də birmənalı qarşılanmadı. Bu məsələyə necə aydınlıq gətirə bilərsiz?

- O futbolçu daha əvvəl Maltada da U-21-in düşərgəsində olub. Hətta yoxlama oyununda əsas heyətdə də oynayıb. O zaman çıxışına baxmışdıq. İndi də sınaqdan keçirəcəyik. Hələ ki biz onu yoxlayırıq. Bəziləri deyir ki, artıq milliləşdirilib. Xeyr, bu, düzgün informasiya deyil. Biz hələ onu sınaqdan keçiririk.

- Çıxışını bəyənsəniz o, milliləşdiriləcək?

- O mövqedə bizdə yerli futbolçular da var. İlk növbədə onlarla rəqabət aparacaq. Yerlilərlə eyni səviyyədə olsa, o futbolçunu milliləşdirməyəcəyik. Təbii ki, belə olan halda öz futbolçularımıza şans verəcəyik.

- Yəqin ki, toplanış zamanı Qana kimi güclü rəqiblə yoxlama oyunu keçirmək ürəyinizcədir?

- Təbii ki. Bildiyim qədəri ilə Qana da U-21 yox, U-20 millisi var. Bununla belə, yenə də rəqib güclüdür. Onlara qarşı oynamaq bizim üçün yaxşı təcrübə olacaq.

- Bir müddət əvvəl seçmə mərhələnin püşkü atıldı və təqvim müəyyənləşdi. Təqvimdən razı qaldınız?

- Təqvimi müəyyənləşdirərkən hərə öz sözünü deyir. Müəyyən dərəcədə təqvim məni qane etdi. Əsas odur ki, oyunlarımız əsas milli ilə üst-üstə düşmür. Bu isə o deməkdir ki, lazım olan bütün futbolçuları heyətə cəlb edə biləcəyik.

- İlk oyunu millimiz səfərdə Farer adalarına qarşı keçirəcək. Startda nisbətən zəif rəqiblə qarşılaşmaq seçmə mərhələyə qələbə ilə başlamaq istəyinizdən irəli gəlir?

- Biz təqvimi tərtib edən edəndə maraqlı bir hadisə yaşandı. Təqvimi tərtib etdikdən sonra gördük ki, 1 oyun qalıb. Bu zaman Farer adalarının nümayəndələri dedilər ki, bəs biz oynamayacağıq? (gülür) O ki qaldı ilk oyunumuza, bu dəqiqə Avropada hamı futbol oynaya bilir. Farer adaları ötən tsiklda qol da vurub, qələbə də qazanıb. Rumıniya ilə heç-heçə oynayıblar, Çernoqoriyaya isə qalib gəliblər. Odur ki, heç bir rəqibə zəif gözü ilə baxa bilmərik.