Rusiya millisinin baş məşqçisi: “1 ay əvvəlki kimi Azərbaycan yığmasını yenə də bəyəndim”

“Bu oyun bizim üçün yaxşı təcrübədi. Dəvətə görə AFFA rəhbərliyinə təşəkkür edirəm”. Futbolxeber.az saytına verdiyi açıqlamada bu sözləri Rusiya U-17 yığmasının baş məşqçisi Mixail Qalaktionov deyib.

Qalaktionov millimizi 2:1 hesabı ilə məğlub etdikləri yoxlama oyunu barədə bunları söyləyib: “Azərbaycan millisi kimi biz də Elit Raundun oyunlarına hazırlaşırıq. Odur ki, Bakıdakı qarşılaşmalar bizim üçün vacibdi. Ötən ayın əvvəlində Sankt-Peterburqda da Azərbaycan yığması ilə qarşılaşmışdıq. Amma həmin komanda 1997-ci il təvəllüdlülərdən qurulmuşdu. Həmin oyundan sonra da sizə verdiyim açıqlamada Azərbaycan yığmasını çox bəyəndiyimi demişdim. Bugünkü komandanın çıxışı da xoşuma gəldi. Yığmanızın heyətində yaxşı futbolçular cəmləşib. Oyun zamanı bir çox futbolçuları yoxlamaq şansı qazandıq. Habelə çatışmayan cəhətləri gördük. Ümid edirəm ki, ikinci oyun da belə maraqlı və gözəl keçəcək”.