“Qəbələ” ilə oyunöncəsi “Bakı”da ciddi itkilər

Azərbaycan Premyer Liqasının 11-ci turunda səfərdə “Qəbələ” ilə görüşəcək “Bakı” qarşıdakı oyuna ciddi itkilərlə çıxacaq. Bu haqda Futbolxeber.az saytına “zolaqlılar”ın mətbuat xidmətinin rəhbəri İsgəndər İsgəndərov məlumat verib. Klub rəsmisi qeyd edib ki, Slovaniyaya yollanan Yure Travner hələ də Bakıya geri qayıtmayıb. Komandanın ən yaxşı bombardiri, cari mövsümdə 5 dəfə rəqib qapılarına yol tapan Nurlan Novruzov da “Qəbələ”yə qarşı oynamayacaq. Gənc hücumçu son turda “Neftçi”yə qarşı baş tutan görüşdə mövsümdə dördüncü sarı vərəqəsini almaqla cəzalı duruma düşüb. Bu iki futbolçudan başqa Eltun Hüseynov də Qəbələdə meydana çıxmayacaq. Gənc müdafiə hələ də zədəsini bərpa etməyib. Əvəzində son turda meydana çıxmayan Vüqar Bəybalayev cəzasının başa vuraraq, heyətə geri dönüb.