"AFFA-nın bu qərarını dərk etmirəm"

"Mən komandanın baş məşqçisiyəm. Bu qərarı mən yox, klubun prezidenti, vitse-prezidenti şərh etməlidir. Amma sırf mənim fikrimi soruşursunuzsa, bu qərarı dərk edə bilmirəm. Ona görə də nə deyəcəyimi, necə şərh edəcəyimi heç özüm də bilmirəm". Bu sözləri Futbolxeber.az saytına verdiyi açıqlamada "Turan"ın baş məşqçisi Əfqan Talıbov deyib.

Lisenziyalaşdırma ilə bağlı yaşanan problemə görə "Turan"ın növbəti mövsümdə Premyer Liqada iştirakına qadağa qoyulması ilə bağlı çıxarılan qərara münasibət bildirən Talıbov bunun komandada ruh düşkünlüyü yaradacağına inanmır: "Qərar artıq qəbul olunub. Bu qərarın dəyişilib-dəyişilməyəcəyini deyə bilmərəm. Amma biz öz işimizi görür, üzərimizə düşəni edirik. Elə indi də komanda ilə birgə məşqdən qayıdırıq. Ruh düşkünlüyündən söhbət gedə bilməz. Komanda ciddi şəkildə qarşıdakı oyunlara hazırlaşır. Bizim əsas məqsədimiz meydana çıxıb, uğur qazanmaqdır".