“Xəzər Lənkəran” 10 ildə 90-a çatdı

Azərbaycan Premyer Liqasının I turu “Xəzər Lənkəran”da bir yubileylə əlamətdar olub. Futbolxeber.az-ın klubun rəsmi saytına istinadən verdiyi məlumata görə, “Ağ-yaşıllar” Azərbaycan çempionatları tarixində 90-cı dəfə meydanı heç-heçə ilə tərk edib.

AZAL-la səfər qarşılaşmasınadək Premyer Liqada 301 oyun keçirən komanda 89 dəfə bərabərliklə kifayətlənmişdi. “AZAL Arena”da keçirilən görüşdə qeydə alınan 1:1 hesabı bu siyahıda 90-cı olub.

2004-cü ildə tarixinin ilk oyununda səfərdə “Turan”la eyni hesablı heç-heçə ilə tarixinə start verən “Xəzər Lənkəran” 90-a 10 ildə çatıb.  Bununla da komanda həm də start ənənəsinə davam edib.

Belə ki, “Xəzər Lənkəran” ardıcıl 3-cü dəfə mövsümə 1:1 hesabı ilə başlayıb. 2012/13 mövsümündə “Rəvan”, 2013/14 mövsümündə “Sumqayıt”la qarşılaşan cənublular ardıcıl 3-cü dəfə ilk görüşdə 1 qol vurub və 1 xalla kifayətlənib. Ardıcıl 3-cü dəfə “Xəzər Lənkəran” ilk turu rəqib meydanında keçirib və yenə 1:1 hesabı qeydə alınıb. Amma əvvəlki iki startdan fərqli, bu dəfə “Xəzər Lənkəran” hesabda geri düşməyib, ilk qolu vuran tərəf olub.

Qeyd edək ki, çempionatdakı 90 heç-heçədən 39-u 0:0, 35-i 1:1, 16-sı 2:2 hesabı ilə başa çatıb.