“Tiraspol”un baş məşqçisi “İnter”ə rəqib olmalarına münasibət bildirməkdən imtina etdi EKSKLÜZİV

“Tiraspol”un baş məşqçisi Vlad Qoyan Avroliqanın ilk təsnifat mərhələsində “İnter”lə qarşılaşmalarına münasibət bildirməkdən imtina edib. Futbolxeber.az saytının əməkdaşı ilə söhbətində 43 yaşlı mütəxəssis yalnız bunları deyib: “İnciməyin, amma əziyyət çəkib zəng vurmusuz. Mən telefonla heç bir açıqlama, müsahibə vermirəm. Yalnız oyundan qabaq mətbuat konfransında suallarınızı cavablandıra bilərəm. Bir dəfə telefonla müsahibə versəm də, jurnalist mənim adımdan tam fərqli sözlər yazmışdı. Odur ki, alınmayacaq”.

Nə qədər cəhd etsək də, Qoyan fikrindən dönmədi: “Yenə deyirəm, inciməyin. Amma mən heç moldovalı jurnalistlərə də telefonla açıqlama vermirəm. Gələrsiz, Tiraspolda danışarıq”.