Futbolçu fabriki Tovuzdan futbolumuza daha bir töhvə

Daim yetişdirdiyi istedalı futbolçularla ad çıxaran Tovuz futbolumuza daha bir istedad  bəxş edib. Belə ki, bu gün “Turan-T”nin heyətində “Şəmkir”ə qarşı matçda iştirak edənlər arasında 15 yaşı yenicə tamam olmuş Ağazadə Abbas da olub. 10 fevral 1999-cu ildə Tovuzda anadan olan Abbas ilk rəsmi oyununa çıxıb. Pleymeyker mövqeyində çıxış edən gənc futbolçu debüt etməsinə baxmayaraq meydandakı soyuqqanlılığı, səhvsiz ötürmələri ilə tribunalara toplaşanlarında alqışını qazanıb. Oyundan sonra futbolçu təəssüratlarını bölüşüb: “İlk oyunuma çıxdığım üçün həyəcanlı idim. Məşqçilərimizə mənə şans verdiyi üçün təşəkkürümü bildirirəm. Bizlərə güvənən, irəli getməyimiz üçün hər şərait yaradan rəhbərliymizə də minnətdaram. Şans veriləcəyi təqdirdə növbəti oyunlarda da çıxış edib öz bacarığımı göstərməyə çalışacaq”.

Qeyd edək ki, “Turan-T”nin əsas heyətində aşağı yaş qrupları üzrə komandalarda özünü yaxşı tərəfdən göstərməyi bacaran bütün yeniyetmələrə şans verilir. Onların üzə çıxmasında , inkişaf etməsində və əsas komandaya yardımçı olmalarında klubda bütün şərait yaradılır.