“Çelsi”nin baş məşqçisi: “Qarabağ” həm güclü, həm də enerjili komandadır”

"Çelsi”nin baş məşqçisi Enso Mareska Londonda sabah UEFA Çempionlar Liqasının Liqa mərhələsinin dördüncü turunda Bakıda “Qarabağ”a qarşı keçiriləcək oyundan öncə mətbuat konfransı keçirib.

Futbolxeber.az saytının məlumatına görə, italiyalı mütəxəssis qeyd edib ki, Azərbaycan çempionu ilə matç onun komandası üçün vacibdir: “Çünki bu qarşılaşma bizə Çempionlar Liqasında ardıcıl üçüncü qələbəni qazandıra bilər. Əlbəttə, bəzi futbolçuları rotasiyaya etmək lazım olacaq. Çünki cümə günü səhər saat 6-da Londona qayıdacağıq və şənbə günü oyun var. Biz uyğunlaşmağa və əlimizdən gələni etməyə çalışacağıq”.

45 yaşlı məşqçi “Qarabağ” haqda müsbət fikirlər səsləndirib: “Onlar yaxşı komandadırlar. “Benfika” və “Kopenhagen”i məğlub ediblər. Bilbaoya da qalib gələ bilərdilər, amma sonda uduzdular. Fərqli səbəblərə görə bu, şübhəsiz ki, çətin oyun olacaq”.

Mareska həmçinin deyib ki, “Qarabağ” həm çox güclü, həm də çox enerjili komandadır: “Onların pressinq tərzi və uzun illərdir eyni baş məşqçi ilə işləmələri bu fikri daha da möhkəmləndirir. Ev oyunlarında xüsusilə daha aqressiv və intensiv çıxış edirlər”.

Həmkarı Qurban Qurbanov barədə danışan Enso Mareska bildirib: “Qarabağ”ın baş məşqçisinin uzunmüddətli fəaliyyətinə gəlincə, bu, mənim indiyə qədər gördüyüm bir şey deyil. Sadəcə inanılmazdır. Eyni klubda 17 il işləmək bu, həqiqətən heyrətamizdir”.

Azərbaycan səfərə gec getmələrinə Mareska belə aydınlıq gətirib: “Dünəni “Tottenhem”lə matçdan sonra bərpa üçün istifadə etdik. Həm oyuna hazırlaşmaq, həm də uçuşu nəzərə alaraq bütün enerjini bərpa etmək baxımından hər iki vəziyyəti tarazlaşdırmağa çalışırıq. Biz İngiltərə vaxtına uyğun qalacağıq”.

Mareska deyib ki, oyunun bütün detalları üzərində işləməyə çalışırlar: “Qarabağ” da bizim kimi iki qələbə qazanıb. Onlar çox yaxşı və təşkilatlanmış komandadır. Bu, çətin oyun olacaq”.