Serbiya klubunun baş məşqçisi oyun zamanı vəfat etdi

Serbiya çempionatının 14-cü turunda keçirilən "Mladost Luçani" - "Radniçki" matçı zamanı faciə yaşanıb.

Futbolxeber.az saytının məlumatına görə, qonaq komandanın baş məşqçisi Mladen Jijoviç oyun vaxtı vəfat edib.

Gün ərzində ürək bulanmasından şikayətlənən Jijoviç matç zamanı da özünü pis hiss edib. Daha sonra 44 yaşlı mütəxəssis qışqıraraq yıxılıb və huşunu itirib. Bu vəziyyətdən oyunçular da narahat olublar. Görüş 41-ci dəqiqədə yarımçıq dayandırılıb.

Baş məşqçi isə huşunu itirdikdən təxminən 20 dəqiqə sonra dünyasını dəyişib.

Bildirilib ki, onun ürəyi dayanıb. Xəstəxanaya aparılan mütəxəssisə müdaxilə edilsə də, həyatını xilas etmək mümkün olmayıb. Ölümün səbəbi hələlik açıqlanmayıb.