Yeni rekord: 53 yaşında yüksək liqada meydana çıxdı

Yaponiyanın “Yokohama” klubunun yarımmüdafiəçisi Kazuyoshi Miura ölkə futbolu tarixinə düşüb.

Futbolxeber.az saytının xarici KİV-ə istinadən verdiyi məlumata görə, Miura ölkə çempionatının 18-ci turunda “Kavasaki Frantale” ilə görüşdə (2:3) meydana çıxıb. Bununla da o, Yaponiya futbolu tarixində yüksək liqada meydana çıxan ən yaşlı futbolçu olub. “Kavasaki Frantale” ilə oyunda Kazuyoshi Miura 53 yaş, 6 ay, 28 günlüyündə olub.

Əvvəlki rekord 2012-ci ildə 45 yaş, 2 ay, 1 günlüyündə “Konsadole Sapporo”nun heyətində forma geyən Masasi Nakayameyə məxsus idi.  

Kazuyoshi Miura artıq 13 ildir “Yokohama”nın şərəfini qoruyur. 53 yaşlı futbolçu cari mövsümdə ilk dəfə meydana çıxıb. Ötən mövsüm ikinci liqada o, 3 qarşılaşmada iştirak etmək şansı qazanmışdı. Miura sonuncu qolunu 2017-ci ildə vurub.

Qeyd edək ki, “Kavasaki Frantale” ilə oyunda 53 yaşlı futbolçu 56-cı dəqiqədə əvəzlənib.