Beyl daha Zidanın rəhbərliyi altında oynamayacağına əmindir

“Real”la Qaret Beyl arasındakı qeyri-müəyyənlik davam edir.

Futbolxeber.az saytının “The Times”a istinadən verdiyi məlumata görə, 31 yaşlı futbolçu bir daha “Real”ın baş məşqçisi Zinəddin Zidanın rəhbərliyi altında oynamayacağına əmindir.

Bununla yanaşı, uelsli yeni klub axtarışına da çıxmır. Bu da anlaşılandır. Çünki hazırkı məqamda heç bir klub ona “Real”da aldığı əməkhaqqını verməyəcək.

Dünən “Real”ın Çempionlar Liqasının 1/4 final mərhələsinin cavab görüşü çərçivəsində “Mançester Siti”yə qarşı keçirəcəyi oyun üçün heyəti açıqlanıb. Zidan Beylin adını iştirak ərizəsinə daxil etməyib. Halbuki uelsli yarımmüdafiəçi zədəli deyil və həftə boyu komanda ilə birgə məşq edib.

Qeyd edək ki, cari mövsüm Beyl La Liqada cəmi 16 görüşdə meydana çıxıb və 2 qol vurub. O, son dəfə iyunun 24-də “Malyorka” ilə qarşılaşmada forma geyib.