Ranqnik “Milan”ın baş məşqçisi olmaq üçün şərtlərini açıqladı

“Leyptsiq”in keçmiş çalışdırıcısı Ralf Ranqnik “Milan”ın baş məşqçisi olmaq üçün şərtlərini açıqlayıb.

Futbolxeber.az saytının İtaliya mətbuatına istinadən verdiyi məlumata görə, alman mütəxəssis bir neçə şərt irəli sürüb.

O, ilk növbədə rəhbərlikdən yüksək səlahiyyətlərlə 5 illik müqavilə tələb edir.   

İkincisi, alman məşqçi “Milan”ın sisteminin yenidən qurulması üçün 140 milyon avro istəyib. Ranqnik kluba 18-20 adamını gətirmək arzusundadı.  

Üçüncüsü, 61 yaşlı məşqçi transfer üçün 75-80 milyon avro ayrılmalı olduğunu düşünür.

Bunlardan başqa, Ranqnik “Milan”ın müasir futbol sərgiləməsini, yeni taktiki sxemlərdən yararlanmağı və komandadakı orta yaş həddinin 22 olmasını arzulayır.

Qeyd olunur ki, Ranqnik hələ ki “Milan”la razılığa gəlməyib. Klub rəhbərtiyi onunla yanaşı, Unai Emeri və “Valensiya”nın keçmiş baş məşqçisi Marselinonun namizədliyini götür-qoy edir.