Bu ölkədə aprelin 4-də yeni futbol mövsümünə start verilir

Aprelin 4-də Tacikistanda yeni futbol mövsümünə start veriləcək.

Futbolxeber.az saytının Rusiya mətbuatına istinadən verdiyi məlumata görə, 2020 mövsümü ölkə superkuboku uğrunda oyunla start götürəcək.

Ölkə çempionu və kubokun qalibi “İstiklol” Tacikistan Superkuboku uğrunda gümüş medalçı “Xudjan”la üz-üzə gələcək. Düşənbədəki mərkəzi stadionda keçiriləcək qarşılaşmaya azarkeşlər buraxılmayacaq.

5 apreldə ölkə çempionatının ilk turu çərçivəsində 3 oyun keçiriləcək. Aprelin 8-də isə daha 3 qarşılaşma oynanılacaq.

Qeyd edək ki, Avropada koronavirusa görə futbol oyunları dayandırıldığı halda, yalnız Belarusda ölkə çempionatının qarşılaşmaları keçirilir. Üstəlik, azarkeşlərin stadiona girişinə də qadağa qoyulmayıb.

Əlavə edək ki, Tacikistanda rəsmi olaraq bu günə qədər heç kim koronavirusa yoluxmayıb.