“Qəbələ”nin sabiq üzvü dubl etdi, komandası Hindistan çempionu oldu

Hindistan çempionatında mövsümə yekun vurulub.

Futbolxeber.az saytının məlumatına görə, çempionluq uğrunda həlledici görüşdə ATK və “Chennaiyin” üz-üzə gəlib. 3:1 hesablı qələbə qazanan ATK çempion olub.

Bu komandaya qələbə gətirən qollardan ikisini Fransisko Xavyer Ernandes Qonzales vurub. Qısaca Havi Ernandes adlandırılan ispan yarımmüdafiəçi azərbaycanlı futbolsevərlərə tanışdır.

Belə ki, 30 yaşlı futbolçu 2017-ci ilin yayında “Qəbələ” ilə 1+1 illik müqavilə imzalamışdı. Lakin təmsilçimiz Avroliqada mübarizəni dayandırdıqdan sonra Havi Ernandes “Qəbələ”dən ayrılaraq yenidən Polşaya, bu dəfə “Krakoviya”ya transfer olunmuşdu.

Qeyd edək ki, “Real”ın yetirməsi olan Xavi Ernandes məşhur futbolçu Qutinin əmisioğludur.