Nazarovdan mövsümdə beşinci qol

Almaniya 2-ci Bundesliqasında 10-cu tura start verilib.

Futbolxeber.az saytının məlumatına görə, millimizin futbolçusu Dmitri Nazarovun şərəfini qoruduğu “Aue” öz meydanında “Nürnberq”lə qarşılaşıb. Nazarov start heyətdə meydana daxil olub və matçı əvəz olunmadan keçirib.

Maraqlıdır ki, 50 dəqiqə ərzində qapılara qol vurulmasa da, azarkeşlər sonradan görüşdə əsl trillerə şahidlik ediblər. 51-ci dəqiqədə qonaqlar hesabı açıblar. 62-ci dəqiqədə Nazarov penaltini dəqiq yerinə yetirməklə status-kvonu bərpa edib. Bununla da Nazarov bu mövsüm vurduğu qolların sayını 5-ə çatdırıb.

75-ci dəqiqədə hesabda önə keçən “Aue” 3 dəqiqə sonra məyus olub. 87-ci dəqiqədə Nazarovun komandası yenidən önə keçib - 3:2.

90+1-ci dəqiqədə “Nürnberq” penalti ilə hesabı bərabərləşdirib. Ancaq 90+3-də “Aue” yenidən önə keçib - 4:3. Lakin bu da görüşdə vurulan son qol olmaya bilərdi. Əgər 90+8-ci dəqiqədə “Nürnberq” penaltidən yararlana bilsəydi. Lakin matçda hesabı açan Freyin dəqiq oynamaması Nazarovun komandasına 4:3 hesablı qələbə qazandırıb.

Bu qələbə sayəsində xallarının sayını 18-ə çatdıran “Aue” turnir cədvəlində 4-cü pilləyə yüksəlib. Nazarovun komandası çempionatın şərikli liderləri olan “Hamburq” və “Ştutqart”dan cəmi 2 xal geri qalır.