Ronaldo “Yuventus”a keçidinin səbəbini açıqladı: “O hadisədən sonra...”

Kriştianu Ronaldo “Yuventus”a keçidindən danışıb.

Futbolxeber.az saytının “Sky Sport İtalia”ya istinadən verdiyi məlumata görə, portuqaliyalı ulduz bildirib ki, klubunu dəyişməsində turinli azarkeşlərin rolu olub:

“Çempionlar Liqasının 1/4 finalında gələcək klubumun qapısına vurduğum qolu xatırlayıram. Həmin anda çox şad idim. Təkcə ona görə yox ki, o cür qol vurmuşdum.

Həm də ona sevinirdim ki, “Yuventus”un azarkeşləri məni alqışlayırdılar. Bu, məni şoka saldı. Turin klubunu əvvəllər də bəyənirdim. O hadisədən sonra komandaya rəğbətim daha da artdı.

Təbii, keçidimdə təkcə o qol rol oynamayıb. Lakin bu amilin də təsiri olub. “Yuventus” böyük klubdur. Burada yeni şans qazanmışam. Menecerimə də demişdim ki, “Real”ı yalnız “Yuventus”a görə tərk edə bilərdim”.