Balotelli Əliyar Ağayevin idarə edəcəyi oyunda iştirak etməyəcək

Avroliqanın qrup mərhələsinin V turunda “Şalke”nin qonağı olacaq “Nitsa” qarşıdakı görüşə ciddi itki ilə çıxacaq.

Futbolxeber.az saytının məlumatına görə, Fransa klubunun aparıcı üzvü Mario Balotelli sabahkı matçda forma geyməyəcək. İtaliyalı hücumçu zədəlidir. SuperMarionun sağ dizinin əzələsində problem var.

Balotelli cari mövsüm “Nitsa”nın heyətində bütün turnirlər nəzərə alınmaqla 9 oyunda meydana çıxıb və 7 qol vurub.

Xatırladaq ki, sabah Bakı vaxtı ilə 22:00-da start götürəcək “Şalke” - “Nitsa” oyununu Əliyar Ağayev idarə edəcək.