Frank de Bur “İnter”dən qovulmaq üzrədi

Frank de Bur tezliklə “İnter”dən qovula bilər. Futbolxeber.az saytının məumatına görə, “A” seriyasının 12-ci turunda “Atalanta”dan alınan 1:2 hesablı məğlubiyyət klub rəhbərliyinin səbr kasasını daşırıb. 12 tur ərzində Milan təmsilçisi 6 dəfə uduzub.

“Sky Sport İtalia”nın iddiasına görə, oktyabrın 26-da “Torino”ya qarşı keçiriləcək matç de Bur üçün son şansdı. Növbəti məğlubiyyət təqdirində 46 yaşlı mütəxəssis postundan uzaqlaşdırılacaq.

“Calciomercato”nun məlumatında isə qeyd olunub ki, hollandiyalı məşqçi “Torino” ilə oyuna qədər də vəzifəsindən göndərilə bilər. Belə ki, “İnter”in italiyalı və çinli rəhbərləri arasında bu məsələdə fikir ayrılığı yaranıb.

Klubun prezidenti Erik Tohir de Buru dəstəkləsə də, “Suning Group” şirkəti və klubun direktoru Pyero Auzilio holland məşqçinin qovulmasının tərəfdarıdı.

“İnter”in yeni baş məşqçisi olmağa namizədlər arasında Leonardo, Loran Blan, Stefano Pioli və Andrea Mandorlininin adı çəkilir.

De Bur özü “Atalanta” ilə oyundan sonra gələcək taleyi ilə bağlı konkret söz deməkdə çətinlik çəkdiyini bildirib.

Qeyd edək ki, 9 turdan sonra “İnter” turnir cədvəlində 14-cü yeri tutur.