“Mançester Yunayted” çempionluğa hazır deyil”

“Mançester Yunayted”in keçmiş müdafiəçisi, hazırda “Sky Sports”da ekspert kimi çalışan Hari Nevill sabiq komandasının “Liverpul”la heç-heçəsini (0:0) şərh edib.

Futbolxeber.az saytının məlumatına görə, veteran futbolçu “Qırmızı şeytanlar”ın cari mövsüm Premyer Liqada qızıl medallara sahib çıxmasının çətin olduğunu söyləyib:

“Liverpul”la oyun bir daha “Mançester Yunayted”in hazırkı vəziyətini ortaya qoydu. Komanda çempionluğa hazır deyil. Mourinyo “Çelsi”yə qayıdarkən də buna bənzər halla qarşılaşmışdı. Həmin vaxt o, komanda ilə çempionluğu qazana bilməyəcəyini etiraf etmişdi.

“Çelsi”də çalışarkən Mourinyo ilk mövsümdə bir çox transferlər reallaşdırdı. İkinci ildə isə heyəti komplektləşdirdi və sonda çempion oldu. Joze nə etməli olduğunu bilir. Klubun transferlər üçün kifayət qədər pulu var. Onlar transfer pəncərəsində lazım olanı edəcəklər”.