Kaxaber Sxadadze: “Komandamla fəxr edirəm”

Gürcüstan millisinin baş məşqçisi Kaxaber Sxadadze komandasının Avro-2016-nın seçmə mərhələsi çərçivəsində Almaniyaya 1:2 hesabı ilə məğlub olduqları görüşü şərh edib. Futbolxeber.az-ın məlumatına görə, gürcü mütəxəssis komandasının çıxışından razılıq etdiyini bildirib: “Əvvəlcə Almaniya millisini qələbə münasibəti ilə təbrik edirəm. Eləcə də futbolçularıma əla oyuna görə minnətdaram. Komandamla fəxr edirəm. Çünki biz dünya çempionlarına qarşı layiqli mübarizə apardıq. Bu qrupda hansısa komandanın Almaniyaya bu qədər çətinlik yaratdığını xatırlamıram. Almaniya ilə daha əvvəl evdə də oynamışdıq. Bu, mənim yığmadakı ilk rəsmi oyunum idi. Budəfəki qarşılaşma göstərdi ki, Gürcüstan millisi doğru yoldadı. Almaniya ilə görüş mənim təyinatımdan sonra Gürcüstan yığmasının sərgilədiyi ən yaxşı oyun idi”.