Zbiqnev Bonek: “Legiya”nı ÇL-ə qaytarmaq üçün sona kimi mübarizə aparacağıq”

Polşa Futbol Federasiyasının prezidenti Zbiqnev Bonek ölkə çempionu “Legiya”nın Çempionlar Liqasından kənarda qalması haqda danışıb. Futbolxeber.az-ın məlumatına görə, Bonev “Legiya”nın qitənin ən mötəbər klub turnirinə qaytarılması üçün sona kimi mübarizə aparacaqlarını qeyd edib: “UEFA-dakı bütün mühüm adamlara zəng vurmuşam. Onlar məni diqqətlə dinlədilər. Lakin həm Mişel Platini, həm də Corcio Marketti eyni sözü dedi: “Biz çox məyusuq Zbiqnev, lakin bu cür hallarda başqa cəza növü yoxdur”. Təbii ki, onlar intizam komissiyasının qərarına təsir edə bilməzlər. Lakin biz təslim olmuruq. Sona kimi mübarizə aparacağıq. Bilirəm, şansımız çox azdır. Bununla belə, hərəkət etməliyik. Onu da əlavə edim ki, yaxşı olardıkı futbolçular PlayStation oynamaqdansa, arada iştirak etdikləri turnirin qaydalarını öyrənsinlər”.

Xatırladaq ki, “Legiya” ÇL-in III təsnifat mərhələsində “Seltik”i 2 oyunun ümumi nəticəsinə görə 6:1 hesabı ilə məğlub etsə də, cəzalı Bartoş Bereşinskinin cəzalı halda meydana çıxmasına görə, UEFA tərəfindən qitə kuboklarından uzaqlaşdırılıb.