PSJ artıq David Luizi tibbi müayinədən keçirir, braziliyalı ən bahalı müdafiəçi adına sahib çıxır

“Çelsi”nin müdafiəçisi David Luizin PSJ-yə transferi reallaşmaq üzrədi. Futbolxeber.az-ın məlumatına görə, Paris klubunun nümayəndələri artıq Braziliyaya yollanıblar. Səfərin məqsədi David Luizin tibbi müayinədən keçməsidir. Həkimlər futbolçunun sağlıq durumunu Braziliya millisinin bazasında yoxlayacaqlar.

Qeyd edək ki, səhər saatlarında PSJ-nin keçidi 48 saat ərzində ictimaiyyətə açıqlayacağı bildirilirdi. Lakin prosesin sürətlənməsi keçidin daha tez rəsmiləşməsinə səbəb ola bilər.  

Britaniyanın “Daily Mail” nəşri keçidin PSJ-yə 50 milyon funt-sterlinqə, “Sky Italia” isə 50 milyon avroya başa gələcəyini yazır. Funt və ya avro olmasından asılı olmayaraq, David Luiz dünyanın ən bahalı müdafiəçisi adna sahib çıxacaq. Bundan əvvəlki rekordu da elə PSJ reallaşdırıb. Paris klubu 2 il əvvəl “Milan”ın müdafiəçisi Tiaqo Silvaya görə 42 milyon avro ödəyib.