"Oyunun penaltilərə qədər davam etməsini istəmərik”

"Finalda çox maraqlı oyun gözləyir. Portuqaliya güclü rəqibdir". Futbolxeber.az saytının məlumatına görə, bu sözləri İspaniyanın 17 yaşadək futbolçulardan ibarət milli komandasının baş məşqçisi Santi Denia deyib.

Bu gün Bakıda keçirilən Avropa çempionatının finalından öncə mətbuat konfransı təşkil edilib.

Jurnalistlərin suallarını cavablandıran ispan mütəxəssis sabah baş tutacaq həlledici görüşlə bağlı bunları söyləyib: “Bizim üçün finalın hansı stadionda keçiriləcəyi vacib deyil. Əsas odur ki, finalda oynayırıq. Stadionun seçilməsi UEFA tərəfindən təyin olunur. Bu, bizə aid olan məsələ deyil. Bu görüşdə xırda detallarla nəticə həll olunacaq. Yaxşı iş görən komanda çempion olacaq”.

İspaniya yığmasının çalışdırıcısı kuboku 80 dəqiqə ərzində qazanmaq istədiklərini vurğulayıb: “Oyunun penaltilərə qədər davam etməsini istəmərik. Penaltini nə qədər məşq etsən də, oyunda atmosfer başqa cür olur, təzyiq hiss edirsən”.

Denia rəqibin səhvlərindən yararlanmağa çalışacaqlarını qeyd edib: “Rəqib səhvlərindən yaralanmağa cəhd edəcəyik. İspaniya Avropa çempionatına ən sonuncu vəsiqə qazanan komandadır. Buna görə də turnirdən öncə bu haqda komanda ilə söhbət etmişdim və onlara daha çox çalışmalı olduqlarını söyləmişdim. Görürəm ki, onlar bundan nəticə çıxarıblar. Bu günə qədər həm oyun, həm də məşqlərdən zövq almışdıq". 

"Layihə AFFA yanında Media Komitəsi tərəfindən maliyyələşdirilir"