“Portuqaliya ilə oyunda qələbəyə köklənmişik”

17 yaşadək futbolçulardan ibarət milli komandamızın üzvü Fərdi Nəbiyev Futbolxeber.az saytına müsahibə verib.

- Avropa çempionatı artıq start götürür. Hazırlıq prosesi necə keçdi?

- Yaxşı keçdi. Avropa çempionatına tam hazırıq. Portuqaliya ilə oyunu gözləyirik.

- Vacib oyun öncəsi komandada hər hansı bir narahatçılıq var?

- Heç bir narahatçılıq yoxdur. Oyuna hazırıq. Meydana qələbə üçün çıxacağıq. Məqsədimiz qrupdan çıxmaqdır.

- Portuqaliyanın üstün və zəif cəhətləri hansılardır?

- Hər bir komandanın üstün və zəif cəhətləri var. O cümlədən də Portuqaliyanın. Rəqib haqda kifayət qədər məlumatımız var. Çalışacağıq ki, rəqibin zəif nöqtələrindən yarlalanıb, qol vura.

- Oyuna tamaşaçı marağı böyükdür. Stadiondakı ajiotaj sizə təzyiq göstərə bilər?

- Azarkeşlərimizin çox olması müsbət məqamdır. Gəlib, bizi dəstəkləsinlər. Biz də meydanda tam gücümüzlə mübarizə aparacağıq.

- Özünüzü 40 min azarkeş önündə oynamağı hazır sayırsız?

- Komandamız buna hazırdı. Tribunadakılar bizim azarkeşlər olacaq, Portuqaliyanın yox. Ona görə də narahatçılığa əsas yoxdur.

- Təbriz Həsənov Portuqaliyaya qalib gəlmək istədiklərini qeyd etdi. Həmin inam komandada da var?

- Portuqaliya ilə oyunda qələbəyə köklənmişik. Birinci oyunlar hər zaman çətin olur. Amma biz yenə də bütün gücümüzü meydanda qoyub, qələbə qazanmağa çalışacağıq.

- Komandanın aparıcı üzvü kimi, azarkeşlərə qol və ya qələbə vəd edə bilərsən?

- Oyundan qabaq heç nə demək olmur. Əlimdən gələni edəcəyəm ki, meydandan qələbəylə ayrılaq.

"Layihə AFFA yanında Media Komitəsi tərəfindən maliyyələşdirilir"