FİDE-nin yeni reytinqi: Şəhriyar Teymuru qabaqladı

Beynəlxalq Şahmat Federasiyası (FİDE) yeni reytinq siyahısını açıqlayıb.

Futbolxeber.az saytının məlumatına görə, ilk "10-luq"da Azərbaycanın 2 təmsilçisi yer alıb.

Şəhriyar Məmmədyarov 4 pillə irəliləyərək 7-ci sıraya yüksəlib. Onun aktivində 2770 reytinq xalı var.

2765 xalı olan Dünya Kubokunun qalibi Teymur Rəcəbov isə 1 pillə geriləyib və 10-cu yerdə qərarlaşıb.

Digər şahmatçılarımızdan Qədir Hüseynov 2665 xalla 73-cü, Nicat Abbasov 2664 xalla 75-cidir. Onların hər ikisi 2 pillə geriləyiblər. 2654 xalı olan Rauf Məmmədov isə 91-93-cü yerləri bölüşdürür.

Siyahıya yenə norveçli dünya çempionu Maqnus Karlsen 2863 xalla başçılıq edir. ABŞ təmsilçisi Fabiano Karuana 2828 xalla 2-ci, çinli Dinq Liren 2791 xalla 3-cüdür.

Qadınlardan Günay Məmmədzadə 2443 xalla 28-ci pilləyə yüksəlib. 2382 xala malik Gülnar Məmmədova 73-cü sırada yer alıb. 2376 xalı olan Xanım Balacayeva isə 1 pillə irəliləyərək 82-ci sırada qərarlaşıb.