29 Mart 2024, Cümə
Ağabala Ramazanov qayıtdı - FOTO
"Zirə"dən ardıcıl 15-ci qələbə
“Səbail”in hücumçusu: 1 qol, 2 qələbə
U-21 millimiz Ukraynaya da uduzdu

Digər idman növləri

Təslim olma, Şah!..

VƏ YA MƏMMƏDYAROVUN BİR AÇIQLAMASINA SÖZARDI

14 yaşlı şahmatçımız Aydın Süleymanlı dünən “Aeroflot Open”də çempion oldu. Moskvada qazanılan bu zəfər böyük uğurdu. 14 yaşlı Süleymanlının inamlı çıxışı artıq indidən Azərbaycan şahmatının gələcəyinin əmin əllərdə olduğunu düşünməyə əsas verir.

Süleymanlı ilk dəfə 2017-ci ildə Rumıniyada 12 yaşlı oğlanlar arasındakı Avropa çempionatının qalibi olmaqla adından söz etdirdi. Ötən il isə onun üçün daha uğurlu oldu. 14 yaşlı istedad əvvəlcə yaşıdları arasında Hindistanda keçirilən dünya çempionatda birinci oldu. Daha sonra isə o, yığmamızın heyətində 16 yaşadək şahmatçılardan ibarət milli komandalar arasında Türkiyənin Çorum şəhərində keçirilən Olimpiadanın qalibi oldu. Turnirdə keçirdiyi 9 oyunda 7 xal yığan Süleymanlı millimizin çempionluğunda böyük pay sahibi oldu.

Bütün bunlar onu göstərir ki, Azərbaycanda artıq dünya səviyyəli növbəti şahmatçı yetişir. Bəlkə də yetişib... Hamımız inanırıq ki, Süleymanlını parlaq gələcək gözləyir. O, yaxın gələcəkdə daha böyük uğurlar qazanacaq.

Bütün bunlar öz yerində. Dünəndən bu yana Süleymanlının uğuru haqda sosial şəbəkələrdə kifayət qədər yazılıb. Təkrarçılıq fikrindən uzağam, toxunmaq istədiyim məqam başqadı.

14 yaşlı şahmatçımızın qələbəsi nə qədər sevincli idisə, Şəhriyar Məmmədyarovun həmin qələbədən sonra sosial şəbəkədə yazdıqları mənim üçün bir o qədər üzücü oldu:

...Bu gənclər mənim, Teymurun, Vüqarın yerini yox, onlar bizdən də üstün olsunlar. Bu sözlər təkcə Aydına aid deyil, irəlidə gedən bütün gənclərə aiddir.

Mən şəxsən yerimi onlara verməyə hazıram. Mən dünyada 2 nömrəli şahmatçı olmağı bacardım, amma bu, azdır. Mən 1 nömrə olacaq şahmatçımızı gözləyirəm. Var qüvvəmlə bizim gənclərin yanındayam. Sizə inanıram və güvənirəm...”

Şahın bu açıqlamasında bədbinlik var. Sanki artıq təslim olub. “Mən dünyada 2 nömrəli şahmatçı olmağı bacardım” nə deməkdir? Yəni məndən bu qədər? Biz Şəhriyar Məmmədyarovdan daha yuxarı nəticə gözləməyək? Şahın maksimumu dünya reytinqində ikinci olmaq idi? İnciməsin, bəlkə də Şəhriyar özü bu nəticə ilə razılaşır, daha artığına nail ola bilməyəcəyini düşünür. Amma bizlər qətiyyən bununla razı deyilik...

Görünür, İddiaçılar turnirindən kənarda qalmaq və son zamanlar sponsor məsələləri ilə bağlı deyilənlər/yazılanlar Məmmədyarova pis təsir edib. Amma əminəm, Şəhriyar şahmatda hələ son sözünü deməyib. Başa düşürəm, yaş ötür. Yaşlandıqca gənclikdəki enerji də olmur. Amma yenə də təslim olmaq olmaz. Onu da anlayıram ki, bir şahmatçı üçün Maqnus Karlsenlə eyni dövrdə yarışmaq, Zlatan İbrahimoviçin Kriştianu Ronaldo və Lionel Messi ilə eyni dövrə təsadüf etməsi kimi bir şeydir. Norveçli bu gün qarşısıalınmaz təsiri bağışlayır. Şahmat tacının sahibi hazırda dünya reytinqində 8-ci olan Şəhriyarı 102, ən yaxın izləyicisi Karuananı 50 reytinq xalı qabaqlayır. Amma bütün bunlar yenə də Şaha təslim olmaq üçün əsas vermir. Hələ çox tezdir. Qarşıda zaman var. İnanıram, hələ inanıram də ki bir gün Şahmat tacı yenidən Bakıda olacaq. Tac isə Şahlara yaraşır...

P.S. Şah, hər şey bir kənara, sən hər zaman oğlunun şahmatçı olmasını arzulayan və ona səni misal göstərən ataları məyus edə bilməzsən. Heç bir ata 35 yaşında təslim olan birini övladına nümunə göstərib, “onun kimi ol” deməz...

İBRAHİM




Şərh yazılmayıb
ŞƏRH YAZ
Adınız, Soyadınız *  
E-mail    
Təhlükəsizlik kodu    
Kodu daxil edin *  







Arxiv

Mart 2024
B.eÇ.aÇC.aCŞB
01 02 03
04 05 06 07 08 09 10
11 12 13 14 15 16 17
18 19 20 21 22 23 24
25 26 27 28 29 30 31