Rüstəm Orucov gümüş, Hidayət Heydərov bürünc medal qazandı

Azərbaycan millisi Yaponiyanın paytaxtı Tokioda keçirilən cüdo üzrə dünya çempionatında ilk medallarını qazanıb.

Futbolxeber.az saytının məlumatına görə, 73 kq çəkidə çıxış edən Rüstəm Orucov finalda Ono Syoxeylə (Yaponiya) qarşılaşıb və rəqibinə ipponla uduzub. Beləliklə, R.Orucov gümüş medalla kifayətlənib.

Eyni çəkidə çıxış edən  Hidayət Heydərov isə bürünc medal qazanıb. O, rəqibi Somon Mahmadbekovu (Tacikistan) əlavə vaxtda məğlub edib.

Xatırladaq ki, Orucovla Heydərov yarımfinalda bir-birlərinə rəqib olmuş və Rüstəm qalib gələrək finala yüksəlmişdi.

Qeyd edək ki, ilk iki yarış günüdə mübarizə aparan Azərbaycan cüdoçuları - Davud Məmmədsoy (60 kq), Nicat Şıxəlizadə (66 kq), Aişə Qurbanlı, Əliyeva Leyla (hər ikisi 48 kq), Gültac Məmmədəliyeva və Larisa Aleksandra Florian (hər ikisi 52kq) medal qazana bilməyiblər.