Qədir Hüseynov: “Evdə oynamaq çətindi”

“Partiya mənim üçün heç də asan olmadı. Çox çətin vəziyyət yaranmışdı. Amma sonda hər şey uğurlu alındı”. Futbolxeber.az-ın məlumatına görə, bu sözləri şahmatçımız Qədir Hüseynov deyib.

Bakıda keçirilən Dünya Kubokundakı ilk görüşündə rusiyalı Maksim Matlakovu üstələyən təmsilçimiz evdə oynamağın həm müsbət, həm də mənfi tərəflərindən söz açıb: “Evdə oynamaq çətindi. Çünki hamı səndən yaxşı nəticə gözləyır. Üstün tərəfi isə odur ki, heç yana səfər etmirsən, yorğunluq olmur. Evdə oynayırsan”.

Hüseynov gələn il Bakıda keçiriləcək şahmat olimpiadasında medal qazanmağa çalışacaqlarını qeyd edib: “Azərbaycan yığması son Avropa çempionatlarında uğurla çıxış edir. Amma olimpiadada hələ ki medal qazana bilməmişik. Bu dəfə əlimizdən gələni edəcəyik ki, medal qazanaq”.

“Əvvəlki dünya kubokunda Şəhriyar Məmmədyarov Maksim Matlakovla qarşılaşmışdı. Bu oyuna hazırlaşmaq üçün o sənə hansı köməklik göstərdi” sualını şahmatçımız belə cavablandırıb: “Yox. Bu, fərdi yarışdı. Ona görə də hamı özü yarışa hazırlaşıb”.