Venesuellalı şahmatçı Bakıdakı dünya kuboku haqda: “Bundan yaxşı təşkilatçılıq mümkün deyil”

Bakıda keçirilən şahmat üzrə dünya kuboku davam edir. Futbolxeber.az-ın məlumatına görə, artıq yarışda ilk turun oyunlarına həsr olunmuş ikinci mətbuat konfransı da baş tutub. Bu dəfə jurnalistlər önünə venesuellalı İturrizaqa Bonelli çıxıb. İlk görüşündə israilli Maksim Rodşteynlə heç-heçə oynayan Bonelli görüşü belə şərh edib: “Oyun kifayət qədər gərgin keçdi. Partiyanın gedişində qələbə də qazana bilərdəm. Amma sonra gördüm ki, hər şey heç-heçəyə doğru gedir”.

Venesuellalı idmançı turnirin təşkilatçılığından da söz açıb: “Azərbaycana ilk dəfədir ki, səfər edirəm. Təşkilatçılıq çox yaxşıdır. Hər şey yüksək səviyyədə təşkil olunub. Deyərdim ki, bundan yaxşı təşkilatçılıq mümkün deyil”.

Ümumilikdə, dünya kubokunda dördüncü dəfə çıxış etdiyini bildirən Bonelli, heç vaxt azərbaycanlı şahmatçılarla üz-üzə gəlmədiyini də sözlərinə əlavə edib.