Kseniya Mustafayeva: “Bakı-2015”də iştirak etməyi səbirsizliklə gözləyirəm”

Avropa Gimnastika İttifaqının rəsmi internet səhifəsində ilk Avropa Oyunlarının iştirakçısı, “Bakı-2015”in beynəlxalq səfirlərindən biri, ritmik gimnastika üzrə Fransa çempionu Kseniya Mustafayevanın müsahibəsi yerləşdirilib. Futbolxeber.az-ın “Azərtac”a istinadən verdiyi məlumata görə, Minskdə anadan olan, gələn həftə 20 yaşını qeyd edəcək Kseniya Bakıda keçiriləcək ilk Avropa Oyunlarına böyük səylə hazırlaşdığını və yarışlarda uğur qazanacağına ümid etdiyini bildirib.

Gənc idmançı qeyd edib ki, Avropa Oyunlarının beynəlxalq səfiri olması onun uğurlarına verilən qiymətin və ona göstərilən etimadın bariz nümunəsidir. K.Mustafayeva ilk Avropa Oyunlarının finalına qədər yüksələcəyinə ümid etdiyini bildirib.

Fransalı gimnast vurğulayıb ki, Avropa Oyunlarında müxtəlif idman növlərini təmsil edən atletlər iştirak etdiyindən insanda Olimpiya əhval-ruhiyyəsi yaranır. O, yarışların, xüsusilə ritmik gimnastikanın tamaşaçılarda böyük maraq doğuracağına əmin olduğunu ifadə edib.