Nazir: “Bakı-2015”ə tam hazırıq”

“Azərbaycan tarixinin ən möhtəşəm tədbirinin açılış mərasiminə cəmi iki həftə vaxt qalıb. İki ildən bir qədər çox müddətdə bütün ölkə bu idman yarışını həyata keçirməyə hazırlaşır. Demək olar ki, bu yarışa tam hazırıq. Artıq yoxlama tədbirlər də keçirilib”. Futbolxeber.az-ın məlumatına görə, bu sözləri “Bakı-2015” Avropa Oyunları Əməliyyat Komitəsinin (BAOƏK) baş icraçı direktoru Azad Rəhimov deyib.

Gənclər və idman naziri bu gün Avropa Oyunlarında iştirak edəcək idmançılarımızla görüş keçirib. Nazir görüş zamanı həm paytaxtımızın yarışa hazır olmasından danışıb: “Bakı şəhərinin siması dəyişib. Bu gözəl şəhər qonaqları qəbul etməyə hazırdı. Yeni yollar çəkilib, parklar salınıb. Çox istəyirik ki, bura gələcək qonaqlar paytaxtımızı sevsinlər və tez-tez bizə qonaq gəlsinlər”.

Azad Rəhimov Azərbaycan yığmasının Bakı-2015-də uğurlu çıxış edəcəyinə inandığını bildirib: “Azərbaycan 2012-ci ildə London Olimpiya Oyunlarında iştirak edəndə, ora lisenziya qazanan idmançıların sayı 53 idi. 50 nəfərdən çox olan heyət böyük komanda statusunu daşıyır. İdmançılarımız açılış mərasimində böyük komanda şəklində bayraqla keçəndə çox sevinirdik. Bakı-2015 Birinci Avropa Oyunlarındakı idmançılarımızın sayı isə 291 nəfərdi. Görün idmançılar üçün necə imkan yaranıb. Belə bir yarışda çıxış etmək idmançılara geniş imkanlar açır. İnanırıq ki, siz bu yarışda böyük nailiyyətlər əldə edəcəksiniz. Bu səbəbdən də Milli Olimpiya Komitəsi və Gənclər və İdman Nazirliyi hər bir sahədə sizə kömək etməyə hazırdı. Bu günə qədər də sizin şəraitinizin yüksək səviyyədə olması, yaxşı təlim-məşq toplanışları keçməyiniz üçün çalışmışıq. Səbirsizliklə 291 nəfərlik komandamızın yeni tikilən Olimpiya stadionundakı yürüşünü gözləyirik. Bu tədbiri həyata keçirmək üçün Milli Olimpiya Komitəsinin prezidenti, Azərbaycan Respublikasının prezidenti cənab İlham Əliyev dəstək verib, diqqət yetirib. Biz onun yüksək etimadını doğrultmalıyıq. Göstərməliyik ki, həqiqətən də, Azərbaycan idman ölkəsidi və onun idmançıları yüksək nailiyyətlər əldə etmək iqtidarındadı. Ən böyük arzum odu ki, iyunun 29-da yenidən burda toplaşaq, medal qazanan idmançılarımızı böyük şərəflə qarşılayaq və onları təbrik edək”.

Mənbə: apasport.az