Hara tələsirsən, Roni? (QEYD)

Təəssüf ki, vaxt məhdudiyyəti daha geniş şəkildə cızma-qara eləməyə imkan vermir. Ona görə qısaca ürəyimizi boşaldaq.

Ronaldinyo Bakıya gəlib? Əladı! Amma o, gəldiyinə görə əla pullar alıb. Əla pulların qarşılığında isə Ronaldinyo bəzi öhdəlikləri yerinə yetirməlidi.

Əvvəla, ulduzsansa, səni bu səviyyəyə çatdıran, bütün dünyada qəlbinə yol tapdığın azarkeşlərə də vaxt ayırmalısan. Bu, sənin borcundur. Gözümün qarşısında dünən ən azı 5-6 nəfərin avtoqraf istəyini geri çevirdi. 50-yə yaxın adamla şəkil çəkdirməkdən imtina etdi.

Belə olmaz, Roni. Sən bura gəlmək üçün pul alırsansa, o pulun qarşılığını verməlisən. Təkcə 1 saat mətbuat konfransında oturmaqla iş bitmir.

Dünən Bakı Olimpiya Stadionunda olan, Ronaldinyo ilə şəkil çəkdirmək arzusu ürəyində qalan maksimum 50-60 nəfər olardı. 50-60 nəfərlə şəkil çəkdirmək ən pis halda yarım saat çəkəcəkdi. Çəkdirmək olardı? Olardı.  

Ronaldinyonun adına Bakıda akademiya açılır. Əladı. Bu işdə təşəbbüskar olan hər kəsə - “Qəbələ” klubuna, nə cürsə bu işdə kluba kömək göstərəcək AFFA-ya təşəkkür düşür. Amma acı mənzərə odur ki, Ronaldinyo mətbuat konfransından sonra stadionun kənarında dayanıb, azyaşlılarla şəkil çəkdirir və gedir. Halbuki ulduz futbolçu əynini dəyişib, meydançada azyaşlılarla 10-15 dəqiqə keçirsəydi, daha yaxşı olardı. Gələcəkdə bu azyaşlılar “mənim Ronaldinyo ilə şəklim var” deməklə kifayətlənməyib, “mən Ronaldinyo ilə biryerdə futbol oynamışam” da deyə bilərdilər. Amma sən bunu etmədin, Roni.

Meydançada uşaqlarla bir qədər futbol, pərəstişkarlarınla şəkil çəkdirmək, avtoqraf vermək - bütün bunların maksimum 1 saat vaxtıvı alacaqdı. Sən akademiyaya da belə yanaşacaqsansa...