Joze Alesio: “Bugünkü oyunda qorxduğum başıma gəldi.

“Komandam meydana çox arxayın, konsantrasiyasız çıxmışdı. Birinci hissədə bu aşkar görünürdü”.

Futbolxeber.az saytının məlumatına görə, bu sözləri futzal üzrə milli komandamızın baş məşqçisi Joze Alesio Da Silva deyib.

Millimiz dünya çempionatının seçmə mərhələsində ikinci görüşdə Monteneqronu 3:2 hesabı ilə məğlub edib.

Braziliyalı mütəxəssis qələbəyə baxmayaraq, komandasının çıxışından narazılıq edib:

“Nəticədə çox pis oynadıq. Çoxdan idi bu cür intizamsız, zəif oynamırdıq. Ancaq fasilədən sonra vəziyyəti dəyişə bildik. Monteneqro heç də zəif komanda deyil. Bunu uşaqlara da demişdim. Baş verənlərə rəğmən, qələbə qazandıq və elit-raunda vəsiqəni təmin etdik. Son oyunda Slovakiya yığması ilə qarşılaşacağıq. Şanslarımız bərabərdir. Bütün rəqiblərə hörmətlə yanaşırıq. Slovakiya hazırda birinci yerdə qərarlaşsa da, bizim də qrup qalibi olmaq kimi iddiamız var. Ciddi hazırlaşacağıq. Rəqibin necə oynadığını, oyunçularının hansı keyfiyyətlərə malik olduğunu bilirik. Şənbə günü tam fərqli oyun olacaq. Fikrimcə, komandanı bu cür oyuna motivasiya etmək asan olacaq. Heyətimizdə cəzalı futzalçı da yoxdur”.