“Azərbaycanla görüşdə ən azı 1 xala layiq olduğumuzu düşünürəm”

“Mehriban qəbula görə təşkilatçı ölkəyə təşəkkür edirəm. Sanki öz evimizdəyik”.

Futbolxeber.az saytının məlumatına görə, bunu futzal üzrə Moldova milli komandasının baş məşqçisi Vladimir Busatıy deyib.

Dünya çempionatının seçmə mərhələsi çərçivəsində Moldova yığması qrupdakı ilk görüşündə Azərbaycan millisinə 1:3 hesabı ilə məğlub olub.

Moldovalı mütəxəssis komandasının ən azı 1 xala layiq olduğunu vurğulayıb: “Oyuna gəldikdə, əlbəttə, nəticədən razı deyiləm. Ən azı 1 xala layiq olduğumuzu düşünürəm. Komanda şəklində pis təsir bağışlamadıq. Rəqibin heyətində fərdi keyfiyyətlərinə görə seçilən oyunçular olsa da, qapıçılarının daha inamlı çıxış etdiyini vurğulamalıyam. Futzalda qapıçı vacib amildir. Bu gün bizim qapıçının da işi az olmadı. 

Məqsədimiz növbəti mərhələyə adlamaqdır. Bu mərhələdə təsadüfi komanda olmur. Əsas mərhələnin nə olduğunu yaxşı bilirik”.