Hafiz Məmmədov: “Canal+”in əməkdaşları bura məqsədli şəkildə göndərilmiş killerlər idilər”

“Bakı” klubunun prezidenti Hafiz Məmmədovun Stadium.az saytına müsahibəsi:

- Hafiz müəllim, əvvəlcə “Bakı”nın “Qarabağ”ı məğlub etməsi barədə fikirlərinizi öyrənmək istərdik...

- Bu gün “Bakı”nın qələbə qazanacağına inanırdım. Ümumiyyətlə, komandama inanıram. Məşqçini də tələsdirmək olmaz. Buna baxmayaraq, liderdən də çox uzaq düşmək lazım deyil. Bu, hələ Pantiçin komandası deyil. O, öz komandasın yaradandan sonra, onun futbolun görəcəyik. Düzünü deyim ki, oyunun ilk yarısına baxdım. İlk yarı başa çatandan sonra maşına minib stadiona gəldim, hesab da artıq 2:1 idi. Mən yolda olanda qollar vurulmuşdu.

- Bəs komandanın ümumi vəziyyəti, çıxışı, əldə etdiyi nəticələr sizi qane edir?

- Razıyam. Bir sıra futbolçularımızı bəzi insanlar bəyənmirdi. “Lans” bizdən bir neçə futbolçu bəyənmişdi. Kamran Ağayevi, Rauf Əliyevi, Əfran İsmayılovu və Cavid Hüseynovu. Onları buraxmadıq, indi isə öz sözlərini deyirlər. Bu iki komanda - “Lans” və “Atletiko” bizə kömək edəcək. “Lans” konkret olaraq Azərbaycan klubudur. “Atletiko”yla da əməkdaşlığımız istənilən səviyyədədir. Pantiçi də bura onun üçün gətirmişik. “Bakı”da ispan modeli olmalıdır. Bunun üçün isə işlər görülməkdədir. Komandaya bir menecer gətirəcəyik. Bu menecer də rəhbərliyə kömək edəcək.

- “Lans” və ya “Atletiko”dan “Bakı”ya hansısa futbolçuların keçidi gözlənilir?

- “Lans”da bizim görüşümüz oldu. İnanın 3-4 futbolçu özü dedi ki, “Bakı”ya gəlmək istəyirlər. “Bakı”ya ulduz futbolçunun gətirilməsi planda yoxdur. Çünki ulduz futbolçu gəlib burada kimlə oynayacaq?! Səviyyəli argentinalı oyunçu Fransada 400 minə oynamağa razıdır, amma bura bir milyona gəlmir. Çünki Fransada yaşayır, orda oynayacaq. Mən “Lans”da futbolçuların qazancına baxıram, 200-300 min avro qazanırlar. “Bakı”dakı oyunçular onlardan çox qazanır.

- Hazırda Azərbaycanda alman modeli tətbiq edilməkdədir. Siz konkret ispan modelinə üstünlük verəcəksiz?

- Yoxdu axı alman modeli, sadəcə metodika var. Azərbaycanda alman modelin tətbiq etmək üçün, futbolçular gedib orda yaşamalıdır, orda oynamalıdır. Biz indi idarə heyətin yaradırıq. Bu iş bir qədər vaxt aparan məsələdir, çünki tələsmək olmaz. Yalnız onu deyə bilərəm ki, Papen idarə heyətində olacaq və ispan mütəxəssis də burda yer alacaq.

- Hər şeyi öz gözləri ilə görmələri üçün Fransa və İspaniyaya azərbaycanlı jurnalistlərin səfərini təşkil etmək fikriniz var?

- Nə vaxt ürəyiniz istəsə, hazıram. “Atletiko” ilə də danışığımız olub. Hər oyunda nə qədər jurnalist getmək istəsə, buyura bilərlər. Özü də VİP sektorda 10-12 nəfərlik yerləri var. Üstəlik, Arda Turanı və digər futbolçuları görmək istəyirlərsə, uşaqlarınızı da apara bilərsiniz. Orada jurnalistlər arasında yarış keçirə bilərik. Ürəyiniz nə istəsə, hazırıq. Bu barədə hələ sponsorluq anlaşması imzaladığımız vaxt razılığa gəlmişdik. Sonradan pulu ödəyərkən, klubun səhmlərinə də sahib olmağa qərar verdik.

- Fransa mətbuatı sizdən müsahibə almışdı və tənqid hədəfinə çevirmişdi. Buna münasibətniz necə oldu?

- Məsələn nə?

- Konkret olaraq “Canal+” sizi tənqid hədəfi seçmişdi...

- Bunu xalq etmir ki... Əsas məsələ odur ki, Lansda hamı bizi sevir. Bu kanal məni anonsa çıxartmışdı ki, kimdir bu adam (gülür). Onların etdikləri boş şeylərdir, belə məqamlara fikir verməyin.  Hara gedirdimsə, məni izləyirdilər.  “Sağ ol ki, gəldin, “Lans”ı xilas etdin” deyə məni alqışlayırdılar. Amma “Canal+”in əməkdaşları bura məqsədli şəkildə göndərilmiş killerlər idilər.

- Sizcə niyə belə etdilər, bunun arxasında nə dayanır?

- Təbii ki, erməni lobbisi. Bu, fransızın işi deyildi. Onlar bura konkret olaraq məni hədəf alaraq gəlmişdilər. Hətta müsahibədən öncə mənə Fransadan bildirmişdilər ki, belə də olacaq. Mən burda olmadığımdan, həmin jurnalistlər 8 gün Bakıda qalmışdılar. Bizim uşaqlar isə onların qulluğunda yaxşı durublar. Sizi inandırım, bu məqam hələ onları bir qədər yumşaltmışdı, yoxsa daha çox böhtan atacaqdılar. Daha da sərt yazmalıydılar. Sifarişləri belə idi. Bir adamlar ki, evimdə məni gizlincə kameraya çəksinlər, daha onlardan nə gözləyəsən. Hələ müsahibəyə keçməmişdən əvvəl onlarla söhbət edirik, kameranı qoyubar yerə, sən demə elə yerdən çəkirmişlər. Elə belə evdə gəzişirik, əllərində də kamera yoxdur, amma verlişdə bunları da verirlər. Düyməli kameradan istifadə ediblər. Mən onlarla müsaibədən əvvəl xoş niyyətlə bir çox məsələlərdən danışdıq, amma bunlar başqa şey verir efirə.

- Onların bu verilişindən sonra Azərbaycanda da bəzi qüvvələr bundan istifadə edib sizi tənqid etməyə başladılar...

- Mən də məhz bu insanları başa düşə bilmirəm. Onlar erməninin istəyiylə belə edir, bəs bunlara nə olub, anlamaq olmur...

- Siz AFFA İcraiyyə Komitəsinin üzvüsüz. Milli komanda da baş məşqçi Berti Foqtsun qalmasını istəyirsiz?

- Məncə qalmalıdır. Bilirəm, alınmır, yaxşı işləmir, amma futbolçular dəyişməlidir.

- Sanki AFFA rəhbərliyindən sizə qarşı soyuq münasibət də var. Çünki tədbirlərinizə yüskək vəzifəli şəxsləri qatılmır...

- Yox, mən elə düşünmürəm, sadəcə mənə arxayındırlar.  Rövnəq Abdullayev çox yaxşı insandır. Bizlər bir-birilərimizə çox yaxın və bələd insanlarıq. Mənim AFFA-yla nə işim var axı, mənə klublar lazımdır. İndi 100 gənc futbolçu “Lans”a, 100 gənci də “Atletiko”ya yollamalıyıq, amma tapa bilmirik.