Syomin Azərbaycan millisində?

"Qəbələ"nin çalışdırıcısı Yuri Syomin Azərbaycan milli komandasının baş məşqçisi postuna əsas namizəddir. Futbolxeber.az-ın məlumatına görə, belə bir iddia ilə Rusiyanın "İzvestiya" qəzeti çıxış edib.

 

Təcrübəli mütəxəssis özü xəbəri şərh etməyib. O qeyd edib ki, hazırda bütün diqqətini çalışdığı "Qəbələ" klubuna yönəldib: "Azərbaycan çempionatında "Neftçi" və "Qarabağ"la birgə yüksək yerlər uğrunda mübarizə aparırıq. Ümumi götürdükdə yerli çempionatın səviyyəsi xeyli yaxşılaşıb. İnfrastruktur və maliyyə baxımından da klublar yaxşı səviyyədədir. Bu ölkəyə xeyli səviyyəli futbolçular və tanınmış məşqçilər gəlir. Düşünürəm ki, Azərbaycan çempionatı MDB ölkələri sırasında Rusiya və Ukraynadan sonra üçüncü pillədə qərarlaşıb”.

 

Syominin rəsmi nümayəndəsi Dmitri Səlyuk isə təcrübəli mütəxəssisin Azərbaycanı seçməsini düzgün addım olduğunu bildirib:

 

"Azərbaycan Futbol Federasiyasının Syomini milli komandanın baş məşqçi vəzifəsinə namizəd görməsi təəccüblü deyil. Onun işi təqdir olunmalıdır. Syomin daha əvvəl turnir cədvəlinin aşağı pillələrində qərarlaşan komandada əla nəticələr qazanır. Onun rəhbərliyi altında komanda artıq yüksək yerlər uğrunda mübarizə aparır. Yuri sübut etdi ki, təkcə böyük klublarda deyil, eyni zamanda kiçik ölkənin, heç bir uğuru olmayan komandada da işləmək öz səmərəsini verir. Düşünürəm ki, Syomin Azərbaycan millisini çalışdırmaq variantını nəzərdən keçirəcək, ancaq məncə, o klubdakı işinə üstünlük verəcək".