"Rahid Əmirquliyevin "Xəzər Lənkəran"da qalacağı dəqiqdir" ÖZƏL

"Xəzər Lənkəran" klubu son günlər Rahid Əmirquliyevin tezliklə komandanı tərk edəcəyi haqda yayılan xəbərlərə münasibət bildirib. Klubun mətbuat xidmətinin rəhbəri Hüseyn Cəbrayıloğlu Futbolxeber.az saytına verdiyi açıqlamada Əmirquliyevin komandada qalacağını bildirib: "Rahidin komandadan gedişi haqda yayılan xəbərlər əsassızdır. Ola bilər ki, hansısa komanda Rahidlə maraqlansın. Amma bu o demək deyil ki, Əmirquliyev komandadan gedir. İstəməklə iş bitmir axı. Mən də çox şey istəyirəm. Rahidin "Xəzər Lənkəran"la uzunmüddətli müqaviləsi var, o komandanın kapitanıdır. Bu səbəbdən də hər hansı gedişdən söhbət gedə bilməz. Həm də transferlə bağlı bu günə kimi heç bir klub "Xəzər Lənkəran"a rəsmi müraciət etməyib".