"Mustafa Denizli Lənkəranda gördüklərindən razı qaldı"

"Mustafa Denizli Lənkərana təşrif buyurduqdan dərhal sonra bazaya yollandı. Şəraitlə yerində tanış oldu, eləcə də stadiona baxış keçirdi". Futbolxeber.az saytına verdiyi açıqlamada bu sözləri "Xəzər Lənkəran"ın mətbuat xidmətinin rəhbəri Hüseyn Cəbrayıloğlu deyib.

Klub rəsmisi təcrübəli mütəxəssisin Lənkəranda gördüklərindən məmnun qaldığını bildirib: "Denizli ot örtüyünün durumundan razıdır. Daha sonra Lənkəranın mərkəzində oldu. Təəssüratlarından belə başa düşdüm ki, Denizli Lənkəranda gördüklərindən razı qaldı".

Hüseyn bəyin sözlərinə görə, hələlik Denizlinin neçə illik müqaviləyə imza atacağı qeyri-müəyyəndir: "Yenidən İstanbula qayıdan təcrübəli mütəxəssis 2-3 gündən sonra ölkəmizə gələcək. Bu dəfə artıq rəsmi müqavilə imzalanacaq. İndidən Denizlinin neçə illik müqaviləyə imza atacağını dəqiq deyə bilmərəm. Hazırda müqavilə hazırlanır. Köməkçiləri barədə də yalnız müqaviləyə imza atdıqdan sonra danışmaq olar".

Hüseyn Cəbrayıloğlu sonda Denizlinin bu gün futbolçularla görüşmədiyini də qeyd etdi: "O, hələ rəsmən "Xəzər Lənkəran"ın baş məşqçisi deyil. Bu gün futbolçularla görüşsəydi, etik cəhətdən düzgün olmazdı".