Samir Abasov: “Bu, bəhanə deyil”

“Rəqibi təbrik edirəm. Ayxan Abbasov mübariz komanda qurub. Tez qol buraxdıq. Hesabı bərabərləşdirmək üçün fürsətimiz oldu. Amma yararlana bilmədik”.

Futbolxeber.az saytının məlumatına görə, bu sözləri “Sumqayıt”ın baş məşqçisi Samir Abasov Azərbaycan Premyer Liqasının VI turunda “Şamaxı”ya səfərdə 0:1 hesabı ilə uduzduqları oyundan sonra deyib.

O, futbolçuların hələ tam hazır olmadıqlarını bildirib: “Oyunun sonunda rəqib qapandıqca bizim qol vurmağımız çətinləşdirdi. Gələcək oyunlara hazırlaşacağıq. Belə period hər komadanın başına gəlir. Çempionatın əvvəlidir. Futbolçular tam hazır deyil. Amma bu, bəhanə deyil”.

Ardıcıl 3 məğlubiyyətə baxmayaraq, S.Abasov bu vəziyyətdən çıxacaqlarına inanır: “Uşaqlar tam formaya düşəndə nəticələr də olacaq. Bu gün fiziki baxımdan balanslı komanda deyilik. Belə əziyyətlər çəkəcəyimizi bilirdik. Hələ çempionatın əvvəlidir. Keçən il də belə problemlər yaşamışdıq. Pis gündə səbrli olmalıyıq. Dava-dalaşla nəsə qazana bilmərik”.

“Rəqibin hündür boylu mərkəz müdafiəçiləri olduğu halda futbolçularınız göylə ötürmələrə üstünlük verirdi. Bu, nə ilə bağlı idi?” sualını mütəxəssis belə cavablandırıb: “Cərimə meydançasında təhlükəli ola bilmirdik. Buna görə də rəqib oyunçuların səhv edəcəyinə ümid edirdik”.