Mustafa Dənizli: "Qarşıdakı iki-üç gün ərzində Azərbaycanda olacağam" EKSKLÜZİV

"Xəzər Lənkəran"ın yeni baş məşqçisi olacaq Mustafa Dənizli Futbolxeber.az saytına eksklüziv müsahibə verib.

- "Xəzər Lənkəran"ın yeni baş məşqçisi olacağınız gözlənilir. İlk öncə bu haqda fikirlərinizi bilmək istərdik.

- Bəli, "Xəzər Lənkəran"dan təklif almışam. Hazırda danışıqlarımız gedir. 3-4 gün əvvəl mənimlə təmas qurdular. İndi də müzakirələr aparılır. Xeyirlisi nəysə o olsun.

- Bizdə olan məlumata görə, artıq razılığa gəlmisiniz...

- Dediyim kimi, danışıqlar gedir. Qarşıdakı günlərdə Azərbaycana gələcəyəm.

- Səfəriniz nə vaxta planlaşdırılır?

- Bir azdan "Xəzər Lənkəran"ın nümayəndələri ilə yenidən görüşəcəyik. Həmin görüşdə nə zaman ölkənizə gələcəyim bəlli olacaq. Yəqin ki, 2 gün ərzində Azərbaycana səfər edəcəyəm.

- "Xəzər Lənkəran" haqda hansı məlumatlarınız var?

- Komanda haqda informasiyam var. Son oyuna baxmışam ("Bakı" ilə oyunu nəzərdə tutur-red.) Bilirəm ki, komandanın durumu heç də yaxşı deyil.

- Həqiqətən də "Xəzər Lənkəran"ın hazırda tutduğu mövqe adına layiq deyil. Sizcə, komandanı bu çətin vəziyyətdən çıxara biləcəksiniz?

- İndidən bu haqda danışmaq istəmirəm.

- Sizdən əvvəl komandanı kimin çalışdırdığını da bilirsiniz?

- Hə, Con Toşak komandanı çalışdırırdı. Amma deyəsən, işləri yaxşı getməyib.

- Komanda üzvlərindən kimisə tanıyırsınız?

- 1-2 futbolçunu tanıyıram. Etame Mbillanın adını çəkə bilərəm. Hansı ki əvvəl "Adanaspor"da forma geyib.

- Azərbaycan futbolu haqda hansı məlumatlarınız var?

- Məlumatlarım ümumidir. Məsələn, millinin oyunlarından əvvəl müzakirələrimiz olurdu. Bundan başqa Azərbaycanda olan dostlarım var. Onlarla da arada əlaqə saxlayırıq.

- Bir neçə gün əvvəl adınız "Qalatasaray"la da yanaşı hallanırdı. İstanbul klubunun meneceri olacağınız deyilirdi...

- Yaxşı olar ki, o haqda ümumiyyətlə danışmayaq (gülür).

 Elman MƏHƏRRƏMOV

P.S. Mustafa Dənizli ilə əlaqə qurmağımızda bizə yardımçı olan "Qarabağ" və "Neftçi"nin keçmiş məşqçisi Mehmet Aka dərin təşəkkürümüzü bildiririk.