Elvin Camalov: “Ağlımıza gəlməzdi ki, səfərdə “Makkabi”yə 3 qol vuraq”

“Çox çətin oyun alındı. İkinci matçda meydanda fərqli rəqib komanda gördük. Nə qədər ağır olsa da, yekunda istəyimizə çatdıq. Şükür Allaha, əziyyətimiz yerdə qalmadı. Sevinirik ki, mərhələni adlayan tərəf bizik”.

Futbolxeber.az saytının məlumatına görə, bu sözləri “Sabah”ın yarımmüdafiəçisi Elvin Camalov UEFA Konfrans Liqasının ikinci təsnifat mərhələsində penaltilər seriyasında Hayfa “Makkabi”sini məğlub etdikləri oyundan sonra deyib.

O bildirib ki, matçın gedişində bəzi epizodlarda rəqib qarşısında çarəsiz qalıblar: “Matça yaxşı başlamamışdıq. Səfər oyununda da belə olmuşdu. Lakin orda 20-ci dəqiqədən sonra toparlandıq. Bu dəfə isə ilk hissədə toparlanmaq alınmadı. Bununla belə, sona kimi mübarizə apardıq, əlimizə düşən qol epizodlarından yaxşı istifadə etdik. Əziyyətimizin bəhrəsini gördük”.

29 yaşlı futbolçu 6 qol buraxmalarına baxmayaraq, mərhələ adlamarına normal yanaşdığını söyləyib: “Çünki biz səfərdə də, evdə də “Makkabi”yə 3 qol vurduq. Halbuki bu, ağlımıza gəlməzdi. Ümumi nəticədə hesab bərabər idi”.

Azarkeşlərə dəstəyə görə təşəkkürünü bildirən Camalov növbəti mərhələdə qarşılaşacaqları İrlandiya təmsilçisi “Sent Patriks”dən də söz açıb: “Bu gün Avropada rahat rəqib yoxdur. Ona görə arxayınlaşmaq olmaz. “Makkabi” ilə səfər matçında heç kim bizi favorit hesab etmirdi. Lakin biz 3:0 hesablı qələbə qazandıq. İndi özümüzü favorit hesab edib, qələbə qazana bilməsək, mənfi düşüncələr formalaşacaq. Ona görə də oynamamış nəsə demək olmaz”.  

Yarımmüdafiəçi start heyətindən kənarda qalmasına da aydınlıq gətirib: “İki gün qabaq məşqdə ağrılarım var idi. Bu barədə baş məşqçi ilə danışığımız oldu. Belə qərara gəldik ki, oyuna ehtiyatdan başlayım, sonradan meydana daxil olum”.

Fərəc Aslanov