Elmar Baxşıyev: “Rəhbərlik tərəfindən niyə müdaxilə olunmalıdır ki?”

“Müəyyən çatışmazlıqlar var idi, onlar da göründü. Amma gələcəyə ümid verən müsbət məqamlar da oldu. Dayanmadan çalışmalıyıq”.

Futbolxeber.az saytının məlumatına görə, "Araz-Naxçıvan"ın baş məşqçisi Elmar Baxşıyev Azərbaycan Premyer Liqasının 30-cu turunda "Neftçi"yə 0:3 hesabı ilə uduzduqları oyundan sonra deyib.

O, Naxçıvan klubunun təklifini düşünmədən qəbul etdiyini bildirib: “Mövsümün sonuna 6 tur qalıb. Çalışacağıq ki, növbəti matçlarda yaxşı çıxış edək. Rəhbərliyin layihəsi məni cəlb etdi. Mən də dərhal çox düşünmədən, təklifi qəbul etdim”.

“Araz-Naxçıvan”da rəhbərliyin baş məşqçinin işinə müdaxil etməsi barədə iddialara E.Baxşıyev belə cavab verib: “Beş gündür ki, komandadayam. Məni tanıyan hamı bilir ki, komandadayamsa, burada cavabdeh şəxs mənəm. Rəhbərliklə görüşdə də, öz tələblərimizi açıqlamışıq. Siz nəyi nəzərdə tutursunuz? Rəhbərlik futbol oynamır. Ümumi işin daha da yaxşılaşdırılacağına çalışacaqlar. Mənə söz veriblər. Futbolçular mənim rəhbərliyim altında məşq edib, oyunlara hazırlaşırlar. Rəhbərlik tərəfindən niyə müdaxilə olunmalıdır ki? Mənə inanıb gətiriblərsə, nəticə və komandaya cavabdeh şəxs mənəm. Məndən qabaq nə olub, olub... İnanıram ki, mənimlə belə davam edəcəklər”.

E.Baxşıyev qarşıya qoyulan hədəflərdən də danışıb: “Avrokuboklara da hazır olmaq lazımdır. Sadəcə, rəhbərliklə söhbətimiz olanda, bizdən daha müqavimətə dözümlü komanda yaratmağımı istədilər. Gəldik və avrokuboklara oynamalıyıq deyə, anlayış yoxdur. Komanda olaraq, ona da hazır olmalısan, onun üçün oyunçulara sahib olmalısan. Yəni bu istəklə olunan bir şey deyil. Gündəlik iş prosesidir ki, onları qaydasına qoyduqdan sonra komanda özü də həmin iddianı bizə qaytaracaq. Altı tur qalıb. Hər oyuna maksimum nəticə üçün çıxmaq məcburiyyətindəyik. Oyun keyfiyyətini daha da yaxşılaşdırmaq lazımdır ki, gələcəkdə komanda daha yeni pilləyə yaxınlaşsın. Birinci ilin komandasıyıq. Siz bu komandadan başlayan kimi, nəsə gözləməyin. Bu komanda günü-gündən oyun planında inkişaf etməlidir. O yerinə düşdükdən sonra, iddiadan daha rahat danışmaq olar”.

Mütəxəssis hesaba baxmayaraq, “Neftçi”nin üstün olmadığını vurğulayıb: “Birinci və 45-ci dəqiqədə qollar buraxdıq. Bu da konsentrasiyanın aşağı olmasından irəli gəlir. Biz səhv etdik, rəqib də yararlandı. "Neftçi"nin bizdən üstün oynadığını düşünmürəm”.