Lunyov: “Əlavə motivasiyaya ehtiyac yoxdur”

"Sabah bizi maraqlı və gözəl oyun gözləyir. Çünki növbəti mərhələyə vəsiqə qazana bilərik. Bir həftə öncə təəssüf ki, Bakıdakı matçda rəqibi məğlub edə bilmədik".

Futbolxeber.az saytının məlumatına görə, bu sözləri "Qarabağ"ın futbolçusu Andrey Lunyov Avropa Liqasının 1/8 finalında "Bayer"lə cavab oyunu öncəsi keçirilən mətbuat konfransında deyib.

O, şansların bərabər olduğunu vurğulayıb: "Bu, futboldur, oyun 90 dəqiqədir. Hər iki komandada 11 nəfər oynayır. Sabah əlimizə düşən fürsətdən istifadə etməyə, öz oyunumuzu oynamağa çalışacağıq".

Rusiyalı qolkiper hər oyuna yüksək motivasiya ilə çıxdığını vurğulayıb: "Bu mərhələdə əlavə motivasiyaya ehtiyac yoxdur. Komanda hər il Avroliqada oynayır. Təcrübəli oyunçularımız çoxdur".