VI duelə doğru

Bu həftə Premyer Liqanın XI turun oyunları keçiriləcək. Futbolxeber.az-ın məlumatına görə, II dövrədə ilk ev oyununa çıxacaq “Qəbələ” oktyabrın 25-də çempionatın autsayderlərindən biri “Sumqayıt”la görüşəcək. Yuri Syominin yetirmələri I dövrədə gözlənilmədən uduzduğu rəqibdən həmin məğlubiyyətin əvəzini çıxmağa çalışacaq. İlk dəfə 2 il əvvəl üz-üzə gələn komandalar 2011/12 mövsümündə də, 2012/13 mövsümündə də 2 dəfə qarşılaşıb. Cari çempionatda artıq 1 dəfə qarşılaşan komandalar ümumilikdə 6-cı duelə çıxacaq. İndiyədək yalnız çempionatda baş tutan görüşlərdə “qırmızı-qaralar” böyük üstünlüyə malikdir. Cari mövsümədək bütün oyunlarda qalib gələn “Qəbələ” ilk dəfə 2 ay əvvəl məğlubiyyət acısı yaşayıb. Lakin 4 qələbəsi və cəmi 1 yenilgisi olan komanda həmin görüşdə də qol sevinci yaşayıb. Top fərqində də “Qəbələ” üstünlüyə malikdir - 11:5. “Qırmızı-qaralar”ın bu oyunlardakı qollarını 9 futbolçu vurub. Luiz Hilario və Viktor Mendi daha çox - hərəyə 2 dəfə fərqləniblər. Rəqibin heyətində isə Ruslan Qurbanov 2 qola imza atıb. “Qəbələ”nin 11 qolundan 6-sı 1-ci, 5-i 2-ci hissədə vurulub. Ev oyunlarında qələbələri sıralayan komanda hər 2 matçda qol buraxmaqla qalib gəlib. Bu isə oyunların məhsuldarlığını göstərir. Belə ki, “Qəbələ”nin 2 ev oyununda ümumilikdə 9 dəfə top qapıdan keçib.