Tərlan Əhmədov: "Azlıqda belə komandalara qarşı oynamaq çətindir"

"İki uğurlu oyundan sonra səfərə də eyni nəticə üçün gəlmişdik. Minimum bir götürmək istəyirdik. İlk 15 dəqiqə də göstərdi ki, komandamız məğlub olmağa yox, qalib gəlməyə gəlib. Meydançada baş verəcək hadisələri əvvəlcədən bilmək olmur".

Futbolxeber.az saytının məlumatına görə, bu sözləri "Kəpəz"in baş məşqçisi Tərlan Əhmədov Azərbaycan Premyer Liqasının 25-ci turunda "Sabah"a 0:2 hesabı ilə uduzduqları oyundan sonra keçirilən mətbuat konfransında deyib.

Onun sözlərinə görə, komandası azlıqda qalsa da, nizam-intizama üstünlük verdi: "Çalışdıq ki, oyunu bərabərləşdirək. Epizodlarımız da oldu. Amma azlıqda qalanda belə komandalara qarşı oynamaq çətindir. İstər-istəməz rəqib evdə oynayır, səviyyə, maddi və digər baxımdan bizdən üstündür. Buna baxmayaraq, mübariz bir komanda formalaşır. Futbolçular uduzmaq yox, qalib gəlmək üçün çalışırlar. Oyunda rəqibə hər tərəfli başağrısı olduqları üçün onlara təşəkkür etdim. Bizi 6 gündən sonra çətin oyun gözləyir. "Zirə" ilə görüşə ciddi hazırlaşmalıyıq".