Çerçesov: "Qarabağ"la oyunda özümüzü saunadakı kimi hiss edirdik"

"Ferentsvaroş"un (Macarıstan) baş məşqçisi Stanislav Çerçesov Çempionlar Liqasının 3-cü təsnifat mərhələsində "Qarabağ"la Bakıda heç-heçə etdikləri ilk matç (1:1) barədə danışıb.

Futbolxeber.az saytının məlumatına görə, “Sport Ekspress”ə danışan rusiyalı mütəxəssis Ağdam təmsilçisinin öz meydanında yaxşı oynadığını xüsusi vurğulayıb:

“Öz meydanında xüsusilə yaxşı çıxış edən rəqibin gücünə görə matçın çətin keçəcəyini gözləyirdik. Və belə də oldu. “Slovan”la oyuna eyni start heyəti ilə çıxsaq da, taktiki düzülüşdə bir qədər dəyişiklik etdik. Bu, görüşün əvvəllərində bizə böyük fayda verdi. Nəticədə layiq olduğumuz qolu vurduq. Amma sonra qol buraxdıq. Bu gün harada səhv etdiyimizi aydınlaşdıracağıq. Cümə axşamı isə komandanın istirahət günü idi".

Çerçesov "Qarabağ"ın baş məşqçisi Qurban Qurbanov və futbolçusu Filip Ozobiçlə söhbət etməsinə də toxunub: "Oyundan əvvəl və sonra həmkarım Qurban Qurbanovla qısaca danışdım. Biz indiyədək tanış deyildik. Final fitindən sonra mən hazırda “Qarabağ”da və Azərbaycan millisində oynayan yarımmüdafiəçi Filip Ozobiçlə danışdım. 10 il əvvəl onu çox gənc yaşlarında “Spartak”a aparan mən olmuşam".

Çalışdırıcı bildirib ki, Bakıda havanın isti olması onlara problem yaradıb: "Matç zamanı havanın temperaturu 30 dərəcədən yuxarı qalxmışdı. Yüksək rütubəti nəzərə alaraq, saunadaymışıq kimi hiss edirdik. Sevinirəm ki, bizim uşaqlar xarakter göstərdilər. Xüsusən də zədələrə görə bir anda iki mərkəz müdafiəçisini əvəzləməli olduq. Məşqçilik karyeramda belə bir şeyin nə vaxt baş verdiyini heç xatırlamıram".

Çerçesov "Qarabağ" azarkeşlərinin Tofiq Bəhramov adına Respublika Stadionunda gözəl ab-hava yaratdıqlarını deyib: "Stadionda gözəl ab-hava hökm sürürdü. Azarkeşlər öz komandalarına necə dəstək olacaqlarını bilirlər. Axı, uzun illər əvvəl mən özüm də bu arenanın meydanına daxil olmuşam. Ona görə də burada qonaq olan futbolçular üçün oyunların nə qədər çətin keçdiyi yadımdadır".

Baş məşqçi "Qarabağ"la Macarıstanda keçirəcəkləri cavab oyunu haqında bunları söyləyib: “Qarabağ” öz üslubu olan keyfiyyətli komandadır. Budapeştdə bizi daha bir çətin görüş gözləyir. Biz həmişə olduğu kimi, tribunalarımızda şiddətli dəstək görəcəyimizə ümid edirik”.

Qeyd edək ki, avqustun 9-da "Qroupama Arena"da oynanılacaq "Ferentsvaroş" - “Qarabağ” görüşü Bakı vaxtı ilə saat 22:00-da başlayacaq.